پی آئی اے کی برطانیہ کیلئے پروازیں اور کراچی کا سوال

مفتی عبدالوہاب

محترم قارئین، پی آئی اے اور کراچی کے حوالے سے ایک ویڈیو دیکھنے کا موقع ملا تو ماضی کے کچھ مناظر ذہن میں تازہ ہوگئے۔ ایک وقت تھا جب کراچی صرف پاکستان کا سب سے بڑا شہر نہیں بلکہ دنیا سے جڑنے کا ایک اہم دروازہ سمجھا جاتا تھا۔ دنیا کی بڑی بڑی ایئرلائنز کراچی آتی تھیں، یہ شہر بین الاقوامی سفر کا ایک اہم مرکز تھا اور یہاں سے دنیا کے مختلف حصوں تک رسائی حاصل ہوتی تھی۔

کراچی کی بندرگاہ، اس کا تجارتی مقام اور اس کا ایئرپورٹ اسے خطے کے اہم شہروں میں شامل کرتے تھے۔ بہت سے لوگوں کے لیے بیرونِ ملک سفر کا آغاز کراچی سے ہوتا تھا۔ آج جب ہم پیچھے مڑ کر دیکھتے ہیں تو سوال پیدا ہوتا ہے کہ وہ مقام کہاں گیا؟ اور کیا وجوہات ہیں کہ ایک وقت کا یہ عالمی رابطوں کا مرکز آج کئی معاملات میں پیچھے نظر آتا ہے؟

ایک وقت تھا جب پی آئی اے صرف پاکستان کی قومی ایئرلائن نہیں بلکہ دنیا کی بہترین ایئرلائنز میں شمار ہوتی تھی۔ یہ وہ ادارہ تھا جس پر فخر کیا جاتا تھا۔ پی آئی اے نے نہ صرف اپنے مسافروں کو سہولت فراہم کی بلکہ خطے کی کئی ایئرلائنز کی تربیت، تکنیکی معاونت اور ترقی میں بھی کردار ادا کیا۔ اس کے پائلٹس، انجینئرز اور ماہرین نے دنیا کی مختلف ایئرلائنز کو کھڑا کرنے میں مدد دی۔ پھر ایسا کیا ہوا کہ جو ائیرلائن غیر ملکی ائیرلائنز کو ان کے پائوں پر کھڑا کررہی تھی، وہ اپنے ہی پائوں کٹوا بیٹھی؟

وقت کے ساتھ یہی ادارہ مسلسل زوال کا شکار ہوتا گیا۔ سوال یہ ہے کہ ایک منافع بخش اور عالمی معیار کی ایئرلائن اس مقام تک کیسے پہنچی؟ وہ کون سی پالیسیاں، فیصلے اور حالات تھے جنہوں نے اسے کمزور کیا؟ اگر ہم واقعی بہتری چاہتے ہیں تو صرف موجودہ مسائل کی بات کافی نہیں، بلکہ ہمیں یہ بھی سمجھنا ہوگا کہ یہ سفر کامیابی سے زبوں حالی تک کیسے پہنچا۔ کیونکہ اداروں کی اصلاح کے لیے ماضی کی غلطیوں کو سمجھنا بھی ضروری ہوتا ہے۔

اب کئی برسوں کے انتظار کے بعد پاکستان انٹرنیشنل ایئرلائنز (پی آئی اے) کی برطانیہ کے لیے پروازیں دوبارہ شروع ہونا یقیناً ایک خوش آئند خبر ہے۔ بیرونِ ملک پاکستانیوں کے لیے قومی ایئرلائن کی براہِ راست پرواز صرف سفر کی سہولت نہیں بلکہ اپنے وطن سے ایک جذباتی تعلق بھی رکھتی ہے۔

ابتدائی طور پر اسلام آباد اور لاہور کے لیے پروازیں بحال کی گئی ہیں، لیکن کراچی کے لیے براہِ راست پرواز کا آغاز نہ ہونا ایک سوال ضرور پیدا کرتا ہے۔
سمجھ نہیں آتا کہ کراچی کے ساتھ ایسا کیوں ہوتا ہے؟

کراچی پاکستان کا سب سے بڑا شہر، معاشی مرکز اور ملک کی سب سے بڑی بندرگاہ کا حامل شہر ہے۔ یہاں لاکھوں لوگ رہتے ہیں، بیرونِ ملک پاکستانیوں کی ایک بڑی تعداد کا تعلق کراچی سے ہے، لیکن بار بار یہ محسوس ہوتا ہے کہ اس شہر کو کئی معاملات میں نظر انداز کیا جاتا ہے۔

اگر کسی وجہ سے مسافروں کی تعداد یا آپریشنل مسائل ہیں تو اس کا حل یہ ہو سکتا ہے کہ کم از کم محدود تعداد میں ہی سہی، ہفتے میں ایک یا دو براہِ راست پروازیں شروع کی جائیں۔ ہر مسافر اسلام آباد یا لاہور جا کر وہاں سے دوبارہ اندرونِ ملک سفر کرنے کی سہولت نہیں رکھتا۔

خاص طور پر بزرگ افراد، بیمار مسافر اور ایسے لوگ جنہیں سفر میں مشکلات کا سامنا ہوتا ہے، ان کے لیے یہ اضافی مرحلہ بہت دشوار ہو جاتا ہے۔ کل ہی میری اپنی ساس سے گفتگو ہوئی جو ایک عمر رسیدہ عزیز کے بارے میں بتا رہی تھیں کہ وہ لندن سے کراچی جانا چاہتے ہیں لیکن صرف اس لیے سفر سے گریز کرتے ہیں کہ انہیں ایک جہاز سے اتر کر دوسرے جہاز میں منتقل ہونا مشکل لگتا ہے۔ ان کی خواہش صرف اتنی ہے کہ ایک مرتبہ جہاز میں بیٹھیں اور براہِ راست اپنی منزل تک پہنچ جائیں۔

دنیا بھر میں ایئرلائنز کا اصول یہی ہوتا ہے کہ وہ اپنے روٹس کو اس طرح ترقی دیتی ہیں کہ زیادہ سے زیادہ مسافر ان سے جڑیں۔ نئے راستے کھولے جاتے ہیں، مسافروں کی سہولت کو بہتر بنایا جاتا ہے اور کاروباری تعلقات کو مضبوط کیا جاتا ہے۔ یہی چیز کسی بھی ایئرلائن کو مضبوط بناتی ہے۔

پی آئی اے ہماری قومی ایئرلائن ہے۔ اس کی بحالی اور بہتری ہم سب کے لیے خوشی کی بات ہے۔ لیکن قومی ادارے کی کامیابی اسی وقت ممکن ہے جب وہ ملک کے تمام بڑے شہروں اور عوام کی ضروریات کو متوازن انداز میں سامنے رکھے۔

کراچی صرف ایک شہر نہیں، بلکہ پاکستان کی معاشی شہ رگ ہے۔ اس کے لوگوں کو یہ احساس نہیں ہونا چاہیے کہ انہیں بار بار نظر انداز کیا جا رہا ہے۔
ایک وقت تھا جب پی آئی اے صرف پاکستان کی قومی ایئرلائن نہیں بلکہ دنیا کی بہترین ایئرلائنز میں شمار ہوتی تھی۔ یہ وہ ادارہ تھا جس پر فخر کیا جاتا تھا۔ پی آئی اے نے نہ صرف اپنے مسافروں کو سہولت فراہم کی بلکہ خطے کی کئی ایئرلائنز کی تربیت، تکنیکی معاونت اور ترقی میں بھی کردار ادا کیا۔ اس کے پائلٹس، انجینئرز اور ماہرین نے دنیا کی مختلف ایئرلائنز کو کھڑا کرنے میں مدد دی۔ پھر ایسا کیا ہوا کہ جو ائیرلائن غیر ملکی ائیرلائنز کو ان کے پائوں پر کھڑا کررہی تھی، وہ اپنے ہی پائوں کٹوا بیٹھی؟

وقت کے ساتھ یہی ادارہ مسلسل زوال کا شکار ہوتا گیا۔ سوال یہ ہے کہ ایک منافع بخش اور عالمی معیار کی ایئرلائن اس مقام تک کیسے پہنچی؟ وہ کون سی پالیسیاں، فیصلے اور حالات تھے جنہوں نے اسے کمزور کیا؟ اگر ہم واقعی بہتری چاہتے ہیں تو صرف موجودہ مسائل کی بات کافی نہیں، بلکہ ہمیں یہ بھی سمجھنا ہوگا کہ یہ سفر کامیابی سے زبوں حالی تک کیسے پہنچا۔ کیونکہ اداروں کی اصلاح کے لیے ماضی کی غلطیوں کو سمجھنا بھی ضروری ہوتا ہے۔

امید ہے کہ متعلقہ حکام اس معاملے پر غور کریں گے اور برطانیہ سے کراچی کے لیے بھی براہِ راست پروازوں کو ترجیح دیں گے۔ کیونکہ بہتر رابطے صرف سفر آسان نہیں کرتے، بلکہ ملک، معیشت اور بیرونِ ملک پاکستانیوں کے تعلق کو بھی مضبوط کرتے ہیں۔