عمرہ کے دوران میں نے پاکستانی زائرین کو کس حال میں دیکھا؟

حرمین شریفین کے حالیہ سفر میں میں نے ایک چیز خاص طور پر نوٹ کی اور اس کا مشاہدہ کیا۔ پاکستان سے بہت بڑی تعداد میں عمرہ زائرین وہاں پر موجود تھے۔ آپ کو واضح طور پر ان میں دو طبقہ محسوس ہوتے ہیں ایک طبقہ وہ ہے جو اپنے لباس سے اپنے رہن سہن سے اور شکل و صورت سے ہی بدحال نظر آتے ہیں اور صاف معلوم ہوتا ہے کہ وہ معاشی تنگی کا شکار ہے۔

یہ لوگ ریسٹورنٹس کا باہر بیٹھے ہوتے ہیں یا پھر راستوں میں کھڑے ہوتے ہیں کہ کوئی آئے اور ان کو کھانا فراہم کرے جیسے کہ عموما لوگ وہاں پر عمرہ کے لئے آنے والوں کو کھانا کھلاتے ہیں تو یہ لوگ بھی اسی انتظار میں ہوتے ہیں کہ کوئی ان کو کھانا دے۔

ایسے افراد کو خاص طور پر ان میں پاکستانیوں کی بڑی تعداد کو دیکھ کر بہت دکھ ہوتا ہے اور شرم بھی آتی ہے۔ کچھ سال پہلے ہمارے برادر اسلامی ملک ترکی کا بھی یہی حال تھا کہ وہ لوگ بہت مشکل حالات کا شکار تھے لیکن آپ اب دیکھیں کہ ترکی نے کس تیزی سے ترقی کی ہے اوراب ہر اچھے ہوٹل میں ترکی کے افراد نظر آتے ہیں ۔

جب ریاست مضبوط ہوتی ہے اور کرپشن رک جاتی ہے تو اس کے اثرات وہاں کے عوام پر بھی ظاہر ہوتے ہیں۔

بہرحال وہاں پر ان پریشان حال لوگوں میں سے کچھ سے میری بات بھی ہوئی۔ کوئی ان میں سے اپنی بھینس بیچ کر آیا ہے کوئی زیور بیچ کر کسی دور دراز گاؤں سے، صرف بیت اللہ کی محبت میں آیا ہے یا پھر روزہ رسول کی محبت اس کو یہاں پر کھینچ لائی۔

یہ لوگ بہت مشکل حالات میں رہتے ہیں رہائش کا بھی کوئی مناسب انتظام نہیں ہوتا اور کھانے کے لیے بھی دوسروں کے محتاج ہوتے ہیں لیکن ان کے دل میں حرمین شریفین کی محبت کی وجہ سے یہاں پر آجاتے ہیں۔

دوسری طرف پاکستانیوں کی ایک بہت بڑی تعداد ہے جو فائیو سٹار ہوٹل میں ٹھہری ہوتی ہے اور انواع و اقسام کے کھانوں سے لطف اندوز ہو رہی ہوتی ہے۔

صاف معلوم ہوتا ہے کہ پاکستان میں طبقاتی تقسیم کتنی گہری اور واضح ہے۔

ایک اور چیز جو بہت شدت سے محسوس کی وہ یہ کہ لوگوں کی اکثریت عمرہ کی تربیت لیے بغیر ہی آجاتی ہے۔ طواف و سعی کے بارے میں درست معلومات نہیں اور دیگر بنیادی معلومات بھی نہیں، لیکن یہ بغیر کسی تربیت کے یہاں پر آ جاتے ہیں۔

اس کے علاوہ ایک اور چیز جو محسوس کی وہ یہ کہ پاکستان سے تعلق رکھنے والے لوگوں میں بڑی تعداد بڑی عمر کے افراد یعنی کے بزرگوں کی ہے اور یہ عمر کے اس حصے میں یہاں پر آتے ہیں جس حصے میں یہ خود سے کام سر انجام نہیں دے سکتے۔

بڑھاپا از خود ایک بیماری ہے۔ عمرہ کے دوران بہت زیادہ چلنا پڑتا ہے لیکن زیادہ عمر ہونے کی وجہ سے یہ لوگ تمام افعال سر انجام نہیں دے پاتے۔

میرے خیال میں لوگوں کے ساتھ ساتھ اسٹیٹ کو بھی دیکھنا چاہیے کہ کیسے ان تمام چیزوں کو مینیج کرے اور اپنے لوگوں کے معیار زندگی کو بلند کریں۔ اور یہ بھی کہ جب لوگ عمرہ اور حج کے لیے جائیں تو ان کو مناسب تربیت کے ساتھ یہاں پر بھیجے کیا پاکستان کی وزارت مذہبی امور اور وزارت حج کا یہ کام نہیں کہ لوگوں کو بنیادی رہنمائی فراہم کرے اور ان کو تربیت دینے کے بعد ہی حرمین شریفین آنے دیا جائے آئے۔