موستار: ایک پل، ایک شہر اور کئی کہانیاں

مفتی عبدالوہاب

موستار کی طرف ایک خوبصورت سفر

بوسنیا کے سفر کا اگلا مرحلہ موستار تھا۔ راستے میں سبز پہاڑ، وادیاں، نیلے پانی کے دریا اور چھوٹے چھوٹے آباد قصبے ساتھ چلتے رہے۔ بوسنیا کا حسن صرف کسی ایک جگہ تک محدود نہیں، یہاں سفر خود بھی منزل کا حصہ بن جاتا ہے۔

کونیتس، جنگ کی ایک خاموش یادگار

موستار جاتے ہوئے کچھ دیر ہم کونیتس میں رکے۔ یہ چھوٹا سا تاریخی شہر دریائے نیریٹوا کے کنارے آباد ہے اور عثمانی دور کی کئی یادیں اپنے اندر سمیٹے ہوئے ہے۔ یہاں واردا مسجد کا وہ مینار خاص طور پر توجہ کھینچتا ہے جس کا بالائی حصہ 1992ء کی جنگ میں تباہ ہوگیا تھا۔ بعد میں مسجد کی مرمت ہوئی، مگر اسلامی کمیونٹی نے مینار کے ٹوٹے ہوئے حصے کو مکمل بحال نہیں کیا، تاکہ وہ آنے والی نسلوں کے لیے جنگ کی تباہ کاریوں کی ایک خاموش یادگار رہے۔

مسجد کے عقب میں ایک چرچ موجود ہے جو بالکل درست حالت میں ہے۔ جس سے معلوم ہوتا ہے کہ یہاں مسلمانوں نے مسیحیوں کی عبادت گاہوں کو نشانہ نہیں بنایا۔

جابلانیتسا جھیل اور ایک یادگار بوٹ ٹور

کونیتس سے آگے سفر میں جابلانیتسا جھیل کا منظر دل موہ لینے والا ہے۔ دریائے نیریٹوا پر بننے والی یہ جھیل پہاڑوں اور گھنے سبزے کے درمیان دور تک پھیلی ہوئی ہے۔ ہم نے یہاں بوٹ ٹور بھی کیا۔ نیلے پانی پر چلتی کشتی، اردگرد خاموش پہاڑ اور ٹھنڈی ہوا، چند لمحوں کے لیے یوں محسوس ہوا جیسے وقت بھی ہمارے ساتھ آہستہ ہو گیا ہو۔ بوسنیا کی ایک خاص بات یہی ہے کہ یہاں تاریخ کے دردناک ابواب کے ساتھ قدرت کا ایسا حسن موجود ہے جو انسان کو سکون، شکر اور غور و فکر کی طرف لے جاتا ہے۔

بلاگائے تکیہ اور صوفیا کی روایت

اس کے بعد ہم بلاگائے کے تاریخی تکیہ پہنچے، جو دریائے بونا کے چشمے کے بالکل کنارے، ایک بلند چٹان کے نیچے قائم ہے۔ صدیوں سے یہ جگہ درویشوں، ذکر و عبادت اور روحانی تربیت سے وابستہ رہی ہے، اور اس کا ذکر سترھویں صدی کے معروف سیاح اولیا چلبی کے سفرنامے میں بھی ملتا ہے۔
بوسنیا میں صوفیا اور درویشوں نے صرف خانقاہیں قائم نہیں کیں بلکہ مسافروں کی خدمت، ذکر، تعلیم، اخلاق اور مقامی لوگوں کے ساتھ تعلق کے ذریعے اسلامی روایت کو معاشرے میں مضبوط کرنے میں اہم کردار ادا کیا۔

یوں راستے کے نظاروں سے بھرپور لطف اٹھاتے ہم مستار پہنچ گئے۔

 موستار: پہلی نظر میں

موستار پہنچتے ہی سب سے پہلے دریائے نیریٹوا اپنی طرف متوجہ کرتا ہے۔ زمردی رنگ کا پانی، دونوں طرف پتھریلی پہاڑیاں اور ان کے درمیان آباد قدیم شہر، منظر ایسا ہے کہ کچھ دیر انسان صرف خاموش ہو کر دیکھنا چاہتا ہے۔ ایسے لمحات صدیوں کی تھکن اتار دیتے ہیں اور انسان ایک بار پھر خود کو اندر تک تروتازہ محسوس کرتا ہے۔

وہ پل جو شہر کی پہچان بن گیا

موستار کا سب سے مشہور مقام پرانا پل ہے۔ عثمانی دور میں 1566ء میں معمار خیرالدین نے اسے تعمیر کیا۔ دلچسپ بات یہ ہے کہ شہر کا نام بھی اسی پل سے جڑا ہے، موستاری ان لوگوں کو کہا جاتا تھا جو پل کی نگرانی کرتے تھے۔

سن 1993ء کی جنگ میں یہ پل تباہ ہوگیا۔ دریائے نیریٹوا میں گرتے ہوئے اس پل کے ساتھ گویا شہر کی ایک شناخت بھی مٹ گئی تھی۔ بعد میں اسے پرانے طریقوں اور طرزِ تعمیر کو سامنے رکھتے ہوئے دوبارہ تعمیر کیا گیا اور 2004ء میں یہ پھر شہر کے دونوں حصوں کو جوڑنے لگا۔ آج یونیسکو اسے مختلف تہذیبوں کے درمیان بقائے باہمی، تعاون اور مصالحت کی ایک اہم علامت قرار دیتا ہے۔

اس پل کو دیکھ کر میرے ذہن میں مسلسل ایک بات گردش کرتی رہی کہ پل بنانا ہمیشہ دیوار بنانے سے زیادہ مشکل ہوتا ہے۔ ہم انسانوں کے درمیان دیوار تو فورا کھڑی کردیتے ہیں لیکن ان کو جوڑنے کیلئے پل بننے اور پل کا کردار نبھانے پر مشکل سے ہی راضی ہوتے ہیں۔

خوبصورتی کے پیچھے جنگ کا درد

بوسنیا کی خوبصورتی کے پیچھے ایک گہرا درد بھی چھپا ہے۔ 1992 سے 1995 کی جنگ میں ہزاروں بے گناہ بوسنیائی مسلمان شہید ہوئے، خاندان اجڑ گئے اور بستیاں ویران ہوئیں۔ آج جب انہی شہروں میں زندگی رواں نظر آتی ہے تو دل ان مظلوم شہداء کے لیے دعا بھی کرتا ہے اور اس قوم کے حوصلے کو سلام بھی، جس نے اتنی بڑی آزمائش کے بعد خود کو دوبارہ سنبھالا۔

قدیم بازار اور عثمانی رنگ

پل کے اردگرد موستار کا قدیم بازار ہے۔ پتھر کی گلیاں، چھوٹی دکانیں، تانبے کے برتن، دستکاری، کافی کی خوشبو اور اردگرد بلند ہوتے مسجدوں کے مینار، ایک لمحے کے لیے انسان کو عثمانی دور کی طرف لے جاتے ہیں۔

محمد پاشا مسجد بھی شہر کی اسلامی شناخت کے نمایاں مقامات میں سے ہے، جہاں سے موستار اور پل کا نہایت خوبصورت منظر دکھائی دیتا ہے۔ موستار کی معماری میں عثمانی، بحیرۂ روم اور بعد کے آسٹرو ہنگیرین اثرات ایک ساتھ نظر آتے ہیں۔

بوسنیا کے مسلمان، ایک منفرد شناخت

مجھے بوسنیا کے مسلمانوں کو قریب سے دیکھنے میں خاص دلچسپی ہے۔ یہ یورپ کے قلب میں بسنے والی ایسی مسلم آبادی ہے جس کی اسلامی شناخت صدیوں پرانی ہے اور اس کے ساتھ ایک مضبوط بوسنیائی اور یورپی تہذیبی رنگ بھی موجود ہے۔

یہاں مسجد بھی زندگی کا حصہ ہے، خاندان بھی، مقامی ثقافت بھی اور کچھ حد تک یورپی طرزِ زندگی بھی۔

جنگ نے ان لوگوں کو بہت کچھ سکھایا اور بہت کچھ چھینا بھی، مگر سب سے متاثر کن بات یہ ہے کہ زندگی رکی نہیں۔ شہر دوبارہ آباد ہوئے، بازار پھر کھلے، مسجدوں میں اذانیں پھر سنائی دیں اور نئی نسل نے اپنے مستقبل کی طرف دیکھنا شروع کیا۔

موستار اسی انسانی حوصلے کی ایک زندہ مثال ہے۔

موستار کے ذائقے

کسی شہر کو سمجھنا ہو تو اس کا کھانا بھی ضرور چکھنا چاہیے۔
یہاں Ćevapi، Burek، Japrak، Dolma اور مختلف گوشت اور سبزیوں کے روایتی کھانے بہت مقبول ہیں۔
کھانے کے بعد چھوٹی سی پیالی میں بوسنیائی کافی، اور ساتھ بکلاوا یا کوئی مقامی مٹھائی، یہاں کی ثقافت کا اپنا لطف رکھتی ہے۔ موستار اور ہرزیگووینا کے کھانوں میں عثمانی، بحیرۂ روم اور بلقان کے ذائقے ایک ساتھ محسوس ہوتے ہیں۔

سفر، مشاہدہ اور شکر

میں خود کو خوش نصیب محسوس کرتا ہوں کہ اللہ تعالی نے مجھ پر احسان کیا اور دنیا کے مختلف ممالک گھمانے کے ساتھ ساتھ ان کی تہذیب و تمدن کو قریب سے جاننے اور سمجھنے کے مواقع بھی عطا کئے۔ الحمدللہ

میرے لیے کسی شہر کی اصل خوبصورتی صرف اس کے پل، بازار یا کھانے نہیں ہوتے۔ شہر کی اصل پہچان اس کے لوگ ہوتے ہیں۔

موستار کو دیکھتے ہوئے بار بار یہی خیال آتا ہے کہ انسان کتنی بڑی تباہی کے بعد بھی دوبارہ گھر بنا سکتا ہے، بازار آباد کرسکتا ہے، پل کھڑا کرسکتا ہے اور زندگی کو آگے لے جاسکتا ہے۔

یہی شاید بوسنیا کے سفر کا سب سے بڑا سبق ہے۔

تاریخ کے زخم اور مستقبل کی امید

یہ سفر ابھی جاری ہے۔ ان شاء اللہ بوسنیا، یہاں کے مسلمانوں، جنگ کی یادوں، تاریخی مساجد، مقامی لوگوں اور ان مقامات کے بارے میں مزید تفصیل سے لکھتا رہوں گا جنہیں ہم اس سفر میں دیکھ رہے ہیں۔

موستار خوبصورت ہے اور اس کی سب سے بڑی طاقت یہ ہے کہ یہاں تاریخ کے زخم موجود ہونے کے باوجود مستقبل کی امید واضح نظر آتی ہے۔