سندھ میں اندوہناک بس حادثہ اور ہماری بے حسی

محترم قارئین ابھی نیوز میں یہ خبر دیکھی کہ سندھ میں بس کا حادثہ ہوا ہے جس میں بہت سے لوگ شہید ہوگئے اور بہت سے لوگ زخمی بھی ہیں اس میں بچے اور عورتیں بھی شامل ہیں۔ سب سے پہلے تو جن افراد کا اس میں انتقال ہوگیا ہے اللہ تعالی ان کی مغفرت فرمائے جو زخمی ہے ان کو جلد از جلد ٹھیک کرے اور لواحقین کو صبر جمیل عطاء فرمائے آمین۔

حال ہی میں میں نے بھی سیلاب زدگان کی مدد کے لیے سندھ کا دورہ کیا تھا وہاں پر ہمارا بھی سفر اسی طرح بہت خطرناک تھا ہم نے خود دیکھا کہ جگہ جگہ کٹ لگے ہیں اور کچھ معلوم نہیں ہوتا کہ کہاں پر سڑک ہے اور کہاں پر کھڈا۔ یہ ایک موت کا سفر تھا اور کسی بھی وقت آپ کی گاڑی الٹ سکتی ہے۔ بس اللہ کے بھروسے اور اس پر توکل کے ساتھ ہی ہم نے سفر کیا۔

آپ اس سے اندازہ لگائیے کہ جو لوگ وہاں پر روزانہ سفر کرتے ہیں وہ کس طرح اپنی جان ہتھیلی پر لے کر یہ کام کرتے ہیں۔ سیلاب آئے ہوئے کئی مہینے بھی ہو گئے اور تب سے جو کٹ لگے ہیں ابھی تک ان کو پورا کرنے کے لیے کوئی عملی کام سر انجام نہیں دیا گیا۔

ابھی تو یہ حادثہ ہوا ہے خدا نا خواستہ اس سے بہت بڑا حادثہ بھی ہو سکتا ہے یہ حادثہ بھی کوئی چھوٹا یا معمولی حادثہ نہیں انسانی جان کی قدر و قیمت کو سمجھنے کی ضرورت ہے۔ خدا نا خواستہ یہ حادثہ کسی اور ملک میں ہوا ہوتا تو اب تک انکوائری بیٹھ چکی ہوتی ذمہ داران کا تعین کیا جا چکا ہوتا رپورٹ مرتب کی جا رہی ہوتی۔ ملک کا وزیراعظم باقی تمام کام چھوڑ کر وہاں پر پہنچ چکا ہوتا۔ اور اس کے ذمہ داران کو کیفر کردار تک پہنچانے کے لیے کام شروع ہو چکا ہوتا۔

ہمارے ہاں ترجیحات میں یہ چیزیں شامل نہیں اور انسانی جان کی عظمت کا کوئی تصور ہی نہیں۔ اس طرح کے حادثات کو ایک معمول کی کارروائی سمجھ لیا جاتا ہے ہماری قوم بھی بیچاری کیا کریے، بس اللہ تعالی حکمران طبقے کو ہی ہوش کے ناخن لینے کی توفیق عطا فرمائے۔

ابھی آپ نے یہ خبر بھی دیکھی ہوگی کہ ڈپٹی کمشنر صاحب نے موٹروے کے دو ارب روپے اپنے پرسنل اکاؤنٹ میں ٹرانسفر کر دیے نہ جانے اس طرح کے کتنے اربوں کھربوں روپے لوگوں کی جیب میں چلے گئے اور کرپشن کا یہ سلسلہ رکنے میں نہیں آرہا اللہ تعالی ان لوگوں کو ہدایت دے۔

یہ بہت دردناک واقعہ ہے بیس افراد کا جاں بحق ہو نا کوئی معمولی بات نہیں ہے۔ ان شہید ہونے والے افراد میں ایک نیا شادی شدہ جوڑا بھی تھا یہ کٹ منچھر جھیل پر دو ماہ سے زائد عرصے سے لگا ہوا ہے اور ابھی تک بھرا نہیں گیا۔ شائد انتظامیہ اسی واقعے کا انتظار کر رہی تھی۔ اللہ تعالی ان کو ہدایت دے۔