سری لنکا سے آئی بی اے کراچی تک

(قسط اوّل۔۔۔۔)

قسط اوّل: ایک خواب، ادھار کا ٹکٹ اور پہلا بین الاقوامی سفر
مفتی عبدالوہاب

کبھی کبھی پرانی تصویریں محض گزرے ہوئے وقت کی یادگار نہیں ہوتیں، بلکہ اپنے اندر ایک پورا زمانہ، بے شمار چہرے اور زندگی کے کئی قیمتی اسباق سمیٹے ہوتی ہیں۔ گزشتہ دنوں پرانی یادوں کی گرد جھاڑتے ہوئے ایک تصویر نظر سے گزری تو اس کے ساتھ ہی ماضی کی ایک خوبصورت داستان ذہن میں تازہ ہوگئی۔

یہ تصویر کراچی کے تعلیمی ادارے، آئی بی اے میں منعقد ہونے والی ایک نشست کی تھی، جہاں چند برس قبل مجھے طلبہ سے گفتگو کا موقع ملا تھا۔ گفتگو کا موضوع میرے زمانہ طالب علمی کا وہ سفر تھا جو میں نے 1992 میں سری لنکا کا کیا تھا۔

بظاہر یہ ایک سفر کی روداد تھی، لیکن درحقیقت اس میں ہمت، منصوبہ بندی، دیانت داری، خود اعتمادی اور عملی جدوجہد کے کئی اسباق پوشیدہ تھے۔

طلبہ سے گفتگو کرتے ہوئے میں نے انہیں صرف یہ نہیں بتایا کہ ایک مدرسے کا طالب علم بغیر کسی ذاتی سرمائے کے کس طرح بیرون ملک سفر پر روانہ ہوا، بلکہ یہ بھی عرض کیا کہ زندگی میں کامیابی اکثر کسی غیر معمولی ذریعے سے نہیں، بلکہ ایک چھوٹا سا قدم اٹھانے سے شروع ہوتی ہے۔

پہلا قدم اور حوصلے کی قوت

زندگی میں خواب دیکھنا آسان ہے، لیکن اس خواب کی طرف پہلا قدم بڑھانا ہمیشہ آسان نہیں ہوتا۔ وسائل کی کمی، ناکامی کا خوف، لوگوں کی باتیں اور مستقبل کی بے یقینی انسان کے قدم روکنے لگتی ہیں۔

میں نے آئی بی اے کے طلبہ سے کہا کہ کامیابی کا آغاز پہلا قدم اٹھانے سے ہوتا ہے، لیکن اس قدم کو اٹھانے کے لیے ایک اور چیز نہایت ضروری ہے، اور وہ ہے حوصلہ۔

اپنے سری لنکن دوست سلیم الدین کا ذکر کرتے ہوئے میں نے انہیں بتایا کہ اس کا ایک جملہ میری زندگی میں ہمیشہ میرے ساتھ رہا۔ وہ اکثر میرا کندھا تھپتھپا کر کہا کرتا تھا:

“عبدالوہاب! ڈرنا مت۔”

یہ اس کا تکیہ کلام تھا، لیکن میرے لیے یہ محض دو الفاظ نہیں رہے۔ زندگی کے مختلف مراحل میں جب بھی کسی مشکل، نئی صورت حال یا غیر یقینی راستے کا سامنا ہوا تو یہ جملہ یاد آیا کہ ڈرنا نہیں، حالات کا سامنا کرنا ہے۔

زندگی میں کئی مواقع ایسے آتے ہیں جہاں انسان کے پاس تمام سوالات کے جواب نہیں ہوتے، راستے پوری طرح واضح نہیں ہوتے اور کامیابی کی کوئی ضمانت بھی موجود نہیں ہوتی۔ ایسے وقت میں ایک قدم حوصلے کے ساتھ آگے بڑھانا پڑتا ہے۔

خواب کے ساتھ منصوبہ بھی ضروری ہے

میں نے طلبہ سے یہ بھی عرض کیا کہ صرف خواب دیکھ لینا یا کسی کام کے بارے میں اچھی گفتگو کرنا کافی نہیں۔ خواب کو حقیقت بنانے کے لیے درست منصوبہ بندی اور پھر اس منصوبے پر پورا عمل ضروری ہے۔

ہم میں سے بہت سے لوگ اچھے خیالات رکھتے ہیں، بڑے منصوبے بناتے ہیں اور کامیابی کی باتیں بھی کرتے ہیں، لیکن عملی قدم اٹھانے کا مرحلہ آتا ہے تو تاخیر، سستی یا خوف کا شکار ہو جاتے ہیں۔

اپنے سفر کی مثال دیتے ہوئے میں نے بتایا کہ میں نے اور سلیم الدین نے جو منصوبہ بنایا، اس پر مکمل طور پر عمل کیا۔ سفر کے لیے ٹکٹ ادھار لیا، سری لنکا میں فروخت کرنے کے لیے کپڑا قرض پر حاصل کیا اور واپسی پر اس قرض کو پوری دیانت داری کے ساتھ ادا کیا۔

یہی دیانت داری انسان کو قابل اعتماد بناتی ہے۔ جب لوگ دیکھتے ہیں کہ کسی شخص نے وعدہ کیا اور اسے پورا بھی کیا، کسی نے اعتماد کیا اور اس اعتماد کی حفاظت بھی ہوئی تو اس شخص کے لیے مزید راستے کھلنے لگتے ہیں۔

اعتماد بازار سے خریدا نہیں جا سکتا۔ یہ انسان اپنے کردار، سچائی اور وعدوں کی پابندی سے حاصل کرتا ہے۔

تجربہ دوسروں تک منتقل کرنا

اس نشست میں میں نے طلبہ کے ساتھ ایک اور اہم اصول بھی شیئر کیا کہ انسان کے پاس جو علم، مہارت یا تجربہ ہو، اسے صرف اپنی ذات تک محدود نہیں رکھنا چاہیے۔

سری لنکا کے کامیاب تجربے کے بعد میں نے اپنے بھائیوں کو بھی اسی راستے پر بھیجا۔ انہیں تمام معاملات سمجھائے، سفر، تجارت اور خرید و فروخت کے طریقے بتائے تاکہ وہ بھی اس تجربے سے فائدہ اٹھا سکیں۔

علم اور تجربہ تقسیم کرنے سے کم نہیں ہوتے بلکہ بڑھتے ہیں۔ انسان اگر کسی راستے کی دشواریوں سے گزر چکا ہو تو اسے چاہیے کہ دوسروں کے لیے وہ راستہ آسان بنا دے۔

ان بنیادی نکات کے بعد میں نے طلبہ کو اپنے سری لنکا کے سفر کی تفصیلات سنائیں، جو آج بھی میری زندگی کی حسین یادوں اور قیمتی تجربات میں شامل ہیں۔

بنوری ٹاؤن سے سری لنکا کا خیال

یہ 1992 کی بات ہے۔ میں اس وقت مدرسہ بنوری ٹاؤن کراچی میں زیر تعلیم تھا۔ ہمارے ساتھ سری لنکا سے تعلق رکھنے والے ایک طالب علم، سلیم الدین صاحب بھی تعلیم حاصل کرتے تھے۔

وہ سری لنکا سے دینی تعلیم حاصل کرنے کے لیے پاکستان آئے تھے۔ میری ان سے اچھی دوستی تھی اور اکثر ہماری گپ شپ رہتی تھی۔ انہی گفتگوؤں کے دوران وہ اپنے ملک، وہاں کے لوگوں، ماحول اور مسلمانوں کے حالات کے بارے میں بتایا کرتے تھے۔

ان کی باتیں سن کر میرے دل میں سری لنکا دیکھنے کا اشتیاق پیدا ہوا۔ حقیقت یہ ہے کہ صرف سری لنکا ہی نہیں، مجھے بچپن سے سفر کا شوق رہا ہے۔ نئی جگہوں کو دیکھنا، مختلف لوگوں سے ملنا اور تہذیبوں اور معاشروں کا مشاہدہ کرنا ہمیشہ میرے لیے باعث کشش رہا ہے۔

بعد کے برسوں میں خداوند کریم نے میری ان خواہشات کو بڑی حد تک پورا بھی فرمایا اور دنیا کے مختلف ممالک دیکھنے کے مواقع عطا کیے۔

عمرہ کے بعد میرا پہلا بین الاقوامی سفر 1992 میں اپنے دوست سلیم الدین کے ساتھ سری لنکا کا تھا۔ اس سفر کی تیاری کی داستان بھی سفر سے کم دلچسپ نہیں۔

سرمایہ نہیں تھا، مگر منصوبہ موجود تھا

میں اس وقت ایک طالب علم تھا اور عموماً طلبہ کے پاس روپے پیسے کی کمی ہی ہوتی ہے۔ بیرون ملک سفر کا شوق تو تھا، لیکن سفر کے اخراجات برداشت کرنے کے لیے کوئی سرمایہ موجود نہیں تھا۔

میں نے اور سلیم الدین نے سوچا کہ کوئی چھوٹا سا کاروباری منصوبہ بنایا جائے۔ طے ہوا کہ کراچی سے کپڑا لے کر سری لنکا جائیں گے، وہاں اسے فروخت کریں گے اور واپسی پر سری لنکا سے پان اور کاجو پاکستان لائیں گے۔

انہیں یہاں فروخت کرکے نہ صرف سفر کے اخراجات پورے کیے جائیں گے بلکہ ادھار بھی ادا کر دیا جائے گا۔

ہم کراچی کی کوآپریٹو مارکیٹ صدر گئے اور وہاں سے کچھ کپڑا ادھار پر حاصل کیا۔ ایک اہم مرحلہ ابھی باقی تھا، اور وہ ہوائی ٹکٹ کا انتظام تھا۔

سلیم الدین سری لنکا جانے کے لیے جس ٹریول ایجنٹ سے عموماً ٹکٹ خریدا کرتے تھے، ہم ان کے پاس پہنچے۔ ہم نے ان سے کہا کہ مجھے ٹکٹ ادھار دے دیں، میں سری لنکا سے واپس آکر اس کی رقم ادا کر دوں گا۔

میری بات سن کر انہوں نے پہلے سر سے پاؤں تک میرا جائزہ لیا۔ شاید وہ سوچ رہے تھے کہ مدرسے کا یہ نوجوان طالب علم کس اعتماد کے ساتھ بیرون ملک سفر کے لیے ادھار ٹکٹ مانگ رہا ہے۔

پھر انہوں نے مسکراتے ہوئے پوچھا:

“واپس آکر پیسوں کا بندوبست کیسے کرو گے؟”

ہم نے انہیں پورا منصوبہ بتایا کہ یہاں سے کپڑا لے کر سری لنکا جائیں گے، وہاں اسے فروخت کریں گے اور واپسی پر پان اور کاجو پاکستان لاکر فروخت کریں گے۔ اس طرح ہم ٹکٹ کی رقم ادا کرنے کے قابل ہو جائیں گے۔

ہماری بات سن کر ان کی حیرانی مزید بڑھ گئی کہ مدرسے کے یہ نوجوان طلبہ کس قسم کی کاروباری منصوبہ بندی کر رہے ہیں۔

بہرحال وہ سلیم الدین کو جانتے تھے، اور شاید اس زمانے کے لوگوں کا مزاج بھی کچھ مختلف تھا۔ انہوں نے مجھ پر اعتماد کیا اور ٹکٹ بنا کر ہمارے ہاتھ میں تھما دیا۔

اس ایک فیصلے نے میرے لیے ایک نئے ملک کے دروازے کھول دیے۔

ساڑھے آٹھ ہزار روپے کا ٹکٹ

ان دنوں پاکستان انٹرنیشنل ایئرلائنز نے سارک ممالک کے سفر کے لیے خصوصی رعایت کا اعلان کر رکھا تھا۔ طلبہ کو بھی کرایے میں رعایت دی جاتی تھی۔ تمام رعایتوں کے بعد ٹکٹ تقریباً ساڑھے آٹھ ہزار روپے میں پڑا۔

آج کے زمانے میں یہ رقم شاید معمولی محسوس ہو، لیکن ایک طالب علم کے لیے اس وقت یہ بڑا خرچ تھا، خصوصاً اس صورت میں جب ٹکٹ بھی ادھار لیا گیا ہو۔

ٹکٹ کے بعد اگلا مرحلہ ویزے کا تھا۔ ہم سری لنکن ہائی کمیشن پہنچے۔ وہاں عملے کا ایک مسلمان رکن سلیم الدین کو جانتا تھا۔ اس تعلق کی وجہ سے معاملات آسان ہوگئے اور انہوں نے میرے پاسپورٹ پر بآسانی ویزا لگا دیا۔

یوں سفر کے دو اہم مراحل، ٹکٹ اور ویزا، مکمل ہوگئے۔

مدرسے کی چھٹیاں اور ایئرپورٹ روانگی

اب ہمیں مدرسے کی سالانہ چھٹیوں کا انتظار تھا، جو چند دنوں بعد شروع ہونے والی تھیں۔ ان دنوں بنوری ٹاؤن میں سری لنکا سے تعلق رکھنے والے کافی طلبہ زیر تعلیم تھے اور سالانہ تعطیلات میں انہیں بھی اپنے ملک واپس جانا تھا۔

وہ سب اس بات پر بہت خوش تھے کہ اس مرتبہ ان کا ایک پاکستانی ہم جماعت بھی ان کے ساتھ سری لنکا جا رہا ہے۔

بالآخر سفر کا دن آگیا۔

مجھے آج بھی اچھی طرح یاد ہے کہ میں اپنے دوست وقار نصیر کے ساتھ اس کی ایف ایکس کار میں کراچی ایئرپورٹ گیا تھا۔ راستے میں کچھ دیر ہوگئی تھی، اس لیے وقار کو خاصی تیز اور خطرناک ڈرائیونگ کرنا پڑی۔

وقار آج بھی میرا بہت اچھا دوست ہے۔ اللہ تعالیٰ اسے خوش رکھے اور اپنی حفاظت میں رکھے۔

کراچی ایئرپورٹ پر حیران افسر

ایئرپورٹ پہنچنے کے بعد سکیورٹی اور کسٹم کا مرحلہ آیا۔ وہاں موجود ایک افسر نے مجھے سری لنکن طلبہ کے ساتھ دیکھا تو بڑی حیرت سے پوچھا:

“تم ان سری لنکن طلبہ کے ساتھ ان کے ملک کیوں جا رہے ہو؟”

میں نے اسے بتایا کہ میں پاکستان سے کپڑا لے کر سری لنکا جا رہا ہوں اور وہاں اسے فروخت کروں گا۔

میری بات سن کر وہ بھی بہت حیران ہوا۔ شاید اس کے لیے یہ بات غیر معمولی تھی کہ مدرسے کا ایک طالب علم کپڑا لے کر تجارت کی غرض سے سری لنکا جا رہا ہے۔

اس نے مجھے کلیئر کرکے آگے جانے کی اجازت دے دی۔ میرے سامان کا وزن بھی مقررہ حد سے کچھ زیادہ تھا، لیکن اس نے عملے سے کہا کہ مدرسے کے طلبہ ہیں، انہیں جانے دیا جائے، اور یوں اضافی وزن بھی کلیئر ہوگیا۔

ان دنوں میں لال رنگ کی افغانی ٹوپی پہنا کرتا تھا۔ اب معلوم نہیں یہ اس ٹوپی کا کرشمہ تھا یا اس افسر کے دل میں دین اور اہل دین کی محبت، بہرحال وہ ہمارے ساتھ بڑی شفقت اور مہربانی سے پیش آیا۔

ایئرپورٹ کے تمام مراحل بآسانی مکمل ہوئے، ہم جہاز میں سوار ہوئے اور کچھ وقت بعد سری لنکا پہنچ گئے۔